26.09.2023

Да се биде медиумски писмен значи да умееме критички да ги читаме информациите, да проценуваме како е создадена и со која цел. Во историјата на човештвото, досега не сме имале поголеми можности да бидеме информирани. Но, тоа не значи дека секогаш се информираме на правилен начин. Информациите, но и сите други медиумски содржини честопати можат да бидат еднострани, половични, наведувачки, да бидат полувистинити или целосно неточни. За сè ова како наставници треба да сме свесни, но и подготвени да ги поучиме и упатиме учениците – како навистина да ги примаат информациите, да ги процесираат, но и како и дали да ги проследат, бидејки сите ние сме чувари на информацијата и имаме одговорност за истата

Во текот на минатата недела во нашето училиште се реализираше обука за “Медиумска писменост” наменета за наставниците и стручните соработници. Оваа обука е дел од проектот на УСАИД – “Младите размислуваат”, под покровителство на МОН, а во реализација на БРО, ИРЕКС, ИКС, Македонскиот образовен форум и Македонскиот институт за медиуми.Обуката преку шест модули, заради обемноста, се реализираше во два дена за секоја од групите, а за поефективно спроведување на самите часови во тек е и подготовка на Прирачници за наставниците и родителите

Голема благодарност за вложениот труд и честитки за успешната реализација на обуката за советничката од БРО, г-ѓа Јулија Глигорова Трајаноска и наставничката – ментор во нашето училиште, М-р Викторија Пауноска

25.09.2023

Учениците од ², ³ и ⁶, заедно со наставничките Катерина Тасевска, Марина Спасовска и Елизабета Славковска реализираа интерактивни, едукативни посети во Планетариумот и МРТ проширувајќи ги знаењата за планетата Земја и Медиумската писменост

Со оваа посета, преку забава и дружење интерактивно реализираа часови од наставната програма по Македонски јазик и по предметот Природни науки #learnthroughplay#funnymoments#planetarium

22.09.2023

Учениците од III одделение го одбележаа 22ри септември – ДЕН БЕЗ АВТОМОБИЛИ – со цел да ги поттикнат луѓето да се движат без автомобили, да користат одржлив транспорт и да ги промовираат придобивките од безбедно одење и велосипедизам

Со силна порака за мудро одбирање на секојдневен транспорт и придонес во намалување на загадувањето ги заокружуваме активностите за одбележување на Европската недела на мобилност #nocarday#eko#europeanmobilityweek#greenpower

22.09.2023

На 20.9.2023 година, по повод Европската недела на спортот, во нашето училиште се одржаа спортски игри со учениците од 3 одделение, реализирани од наставничката по Физичко и здравствено образование Александра Баевска

Настаните се поддржани од Агенцијата за млади и спорт и Федерацијата на училишен спорт

#ВоЗдравоТелоЗдравДух

22.09.2023

Eвропската недела на мобилност под мотото: “Движи се рационално – штеди енергија” учениците од 4⁴ и 4⁵ со нивните оделенски наставници Ирена А. Панова и Марија Ивановска и наставникот по Физичко и здраствено образование, Владимир Петков ја одбележаа со спортски активности во сала

Особено задоволство и чест беше присуството на г-ѓа Софија Зафировска, претставник од Одделението за комунални работи и заштита на животната средина при Општина Аеродром

21.09.2023

Уште една акција на нашите ученици – екоактивисти од Активот на петто одделение кои изработија флаери во духот на Европската недела на мобилност и истите ги поставија во поштенските сандачиња на нашите сограѓани

Сè ова што го правиме со нашите ученици се многу мали чекори кон едно сеопшто освестување на сите нас и токму затоа се многу вредни, значајни и иако мали – многу се големи#europeanmobilityweek#nocarday

21.09.2023

Вистинската книга може да ве мотивира и да ви го даде потребниот стимул за да поработите на вашиот личен напредок, а како што рекол некој непознат автор: „За да станете паметни потребно е да прочитате само десет книги. Но, за да ги најдете тие десет, треба да прочитате илјадници“

Во рамките на планираните активности повторно го збогативме и обновивме библиотечниот фонд во Училишната библиотека, со повеќе од сто книги – нови наслови, но и стари, добри четива од светската и домашната литература за деца и млади, за да можат нашите ученици секојдневно да истражуваат и да трагаат по своите „десет книги“

#booklover#librarylove#magic

20.09.2023

Учениците од 4² и 4³ одделение, заедно со наставничките Катерина Тасевска и Марина Спасовска твореа во природа и ја одбележаа Европската недела на мобилност

Учениците од 4² одделение цртаа цртежи со еко содржини со кои ја украсија својата училница, а дел поставија и во училишниот хол – да бидат потсетник за сите нас, како треба “зелено” да се движиме и да ја зачуваме околината

Учениците од 4³ одделение изработија еко флаери и ги прикачија на паркираните автомобили во близина на училиштето, со апел до возачите – поретко да ги користиме автомобилите и да се грижиме за околината и здравјето на сите нас

20.09.2023

Со низа активности посветени на алтернативно и одржливо движење и учениците од Активот на второ одделение се вклучија во одбележувањето на Европската недела на мобилност – цртаа и изготвуваа еко пароли на тема „Движи се рационално и штеди енергија”

Со еко паролите се движеа низ околината на училиштето за да испратат силна порака до локалното население за зголемено користење на алтернативни видови на транспорт и за здрава и чиста околина

#europeanmobilityweek#ekocall

И оваа учебна година нашите првачиња ќе бидат дел од проектот на Општина Аеродром “Учиме да пливаме”.

Уште една генерација ученици кои ќе поминат часови полни релаксација и забава со тренерите и наставниците по физичко и здравствено образование#SwimLessons#swimschool#ЗаЗдравиИСреќниПрвачиња