Проекти

 

Организацијата на Црвениот крст и црвената полумесечина, тема: “Кардиоваскуларни заболувања – причини, последици и превенција од нив”


Организацијата на Црвениот крст и црвената полумесечина, на 21.2.2022 год., во нашето училиште оствари стручно предавање на тема “Кардиоваскуларни заболувања – причини, последици и превенција од нив”. Лекарот, во присуство на в.д.директорката м-р Сања Стојанова, педагогот, наст.по граѓанско образование, а во интеракција со децата, на мошне интересен и приемчив начин објасни за лошите животни навики, кои најчесто се причина за појавата на болестите кај срцето и венскиот систем. Им понуди на децата и одлични совети за развивање на добрите животни навики, како превенција од кардиоваскуларни заболувања, со единствена цел – грижата и заштитата на физичкото и менталното здравје. Тоа ќе се постигне ако се придржуваат на правилната здрава исхрана, спортувањето и отфрлањето на штетните навики и зависностите, за што подолго да имаат добро здравје и успешен живот. Нашето училиште секогаш, со огромно задоволство соработува со оваа организација, затоа што со своите активности ни помага во правилното воспитание и едукација на нашите млади. Со нетрпение ја очекуваме нивната следна посета.

 


 

Инклузивно игралиште во дворот на ООУ„Љубен Лапе“ во рамки на проектот „Биди ИН, биди ИНклузивен, биди ИНклудиран“

 

Скопје, 30.12.2021Од денес учениците од основното училиште „Љубен Лапе“ во општина Аеродром ќе може да спортуваат, да играат и да другаруваат на новото инклузивно и пристапно игралиште сместено во дворот на училиштето.

Ова е осмо инклузивно игралиште, како дел од проектот „Биди ИН, биди ИНклузивен, биди ИНклудиран“ финансиран од Европската Унија. Овој проект веќе 16 месеци успешно работи во насока на суштинско вклучување на учениците со попреченост во редовните основни училишта.

 

 

 

 

 

„Образованието им помага на децата да прераснат во возрасни кои знаат да се справат со предизвиците во нивниот приватен и социјален живот. Образованието им помага на децата да разберат дека индивидуалноста значи различност и дека сите поединци, колку и да се различни, имаат исти права и ги збогатуваат нашите општества. Целосното вклучување на децата со попреченост во редовниот училишен систем не е лесна задача, ниту во земјите на ЕУ. Резултатите варираат, исто така поради различните национални дефиниции за посебни потреби и различните традиции на училишниот систем. Сепак, политиката на ЕУ за ова е јасна: мора да се оддалечиме од сегрегираното специјално образование. Попреченоста е прашање на права, а не прашање на дискреција.“ посочи г-н Стефан Ходулин од канцеларијата на ЕУ во земјава.

Оваа инклузивно игралиште во основното училиште „Љубен Лапе “ во кое се образуваат повеќе од 1100 ученици е од огромна важност за Општина Аеродром.

 

 

 

 

 

„ Инклузивните игралишта нудат стимулација на учениците со попреченост и нивна вклученост во играта, она што во суштина е најзначајно за децата. Со задоволство го ставаме во употреба ова игралиште и со него ја унапредуваме инклузивноста во училиштето и пристапноста на образовните програми до сите ученици, но и на општината. Многу е  важно децата со посебни потреби да имаат еднакви можности за образование, спортување, учење и другарување со сите останати ученици.“ – изјави градоначалникот на Аеродром, г-н Тимчо Муцунски.

Проектот „Биди ИН, биди ИНклузивен, биди ИНклудиран“ има за цел да им помогне на училиштата каде учат учениците со попреченост – стипендисти на Проектот да ја подобрат својата инклузивност и пристапност. Со создавање на пристапни и стимулативни средини за учење, како и високо квалитетна прилагодена настава за учениците, училиштата опфатени со проектот стануваат места со еднакви  можности за образование на децата, вклучувајќи ги и оние со физичка, сетилна и интелектуална попреченост.

„Во текот на овие 16 месеци спроведување на проектот „Биди ИН, биди ИНклузивен, биди ИНклудиран“, кој е финансиран од Европската Унија, доделени се стипендии на 471 ученици во почетните одделенија, се спроведе обука за повеќе од 280 претставници од училиштата, опремивме осум инклузивни игралишта, пет сензорни соби, една сензорна градина и доделена е асистивна технологија во четири училишта. Веруваме дека со овие активности навистина ја менуваме сликата за инклузивното образование во земјава и придонесуваме кон еднаквост во образованието, но и градење инклузивно општество за сите.“, рече Елена Мишиќ од Фондацијата „Чекор по чекор“.

Проектот „Биди ИН, биди ИНклузивен, биди ИНклудиран“ го реализира Фондацијата за образовни и културни иницијативи „Чекор по чекор“ заедно со своите партнери Здружението за промоција и развој на инклузивно општество „Инклузива“ и Здружението за давање услуги на лицата со попреченост „Хендимак“. Проектот се реализира во соработка со Министерството за образование и наука.

                                                   Фондација за образовни

                                                   и културни иницијативи

                                               „Чекор по чекор“